🗳️ ការបោះឆ្នោតគាំទ្រ​ សមាជិកក្រុមប្រឹក្សាភិបាលថ្មី(គណៈកម្មធិការគ្រប់គ្រង)នៃវេទិកានៃអង្គការមិនមែនរដ្ឋាភិបាល​ ស្ដីពីកម្ពុជា

លោក ម៉ន សុគឿន

YFP, ភ្នំពេញ

បច្ចុប្បន្ន លោកជានាយកប្រតិបត្តិអង្គការយុវជនដើម្បីសន្តិភាព (YFP) ដែលមានសញ្ញាបត្រអនុបណ្ឌិតចំនួនពីរ និងបទពិសោធន៍ជាង ១៩ ឆ្នាំ។ លោកមានជំនាញឯកទេសលើការកៀរគរយុវជន និងសហគមន៍ដើម្បីការពារបរិស្ថាន ជាពិសេសការអភិរក្សធនធានធម្មជាតិនៅក្នុងតំបន់ព្រៃឡង់។ ក្រៅពីនេះ លោកក៏មានបទពិសោធន៍យ៉ាងជ្រៅជ្រះលើការងារកសាងសន្តិភាព និងការអប់រំអំពីប្រវត្តិសាស្ត្រខ្មែរក្រហមនៅក្នុងប្រព័ន្ធអប់រំសាធារណៈផងដែរ។

លោក ធុម វីរ៉ា

HelpAge Cambodia, បាត់ដំបង

បច្ចុប្បន្ន លោកជានាយកប្រតិបត្តិនៃ HelpAge Cambodia ហើយបានដឹកនាំការអភិវឌ្ឍកម្មវិធី គោលនយោបាយ និងបណ្តាញគាំទ្រមនុស្សចាស់ទាំងក្នុងកម្ពុជា និងតំបន់អាស៊ី-ប៉ាស៊ីហ្វិក ហើយលោក​ មានសញ្ញាបត្រ MBA និងមានជំនាញក្នុងការគ្រប់គ្រងអង្គការ ការអភិវឌ្ឍយុទ្ធសាស្ត្រ ការតស៊ូមតិគោលនយោបាយ និងការគ្រប់គ្រងហិរញ្ញវត្ថុ។ លោកបានចូលរួមយ៉ាងសកម្មក្នុងការរៀបចំគោលនយោបាយជាតិស្តីពីមនុស្សចាស់ ការស្រាវជ្រាវអំពីការគាំពារសង្គម។​

អ្នកស្រី​ ឆុន ស្រស់

BSDA, កំពង់ចាម

បច្ចុប្បន្ន អ្នកស្រីជា​នាយិកានៃអង្គការ សកម្មភាពព្រះពុទ្ធសាសនាដើម្បីអភិវឌ្ឍន៍សង្គម (BSDA) ហើយបានដឹកនាំការអភិវឌ្ឍកម្មវិធីក្នុងវិស័យអប់រំ សុខាភិបាល អភិវឌ្ឍសហគមន៍ និងសង្គ្រោះសង្គម ដើម្បីលើកកម្ពស់គុណភាពជីវិតប្រជាពលរដ្ឋក្រីក្រ ជាពិសេសស្ត្រី កុមារ និងយុវជន នៅក្នុងប្រទេសកម្ពុជា។ អ្នកស្រីមានបទពិសោធន៍យ៉ាងខ្លាំងក្នុងការគ្រប់គ្រងអង្គការ ការរៀបចំ និងដឹកនាំគម្រោង ការបង្កើតយុទ្ធសាស្ត្រ និងការគ្រប់គ្រងហិរញ្ញវត្ថុ ព្រមទាំងធ្វើការជាមួយដៃគូអភិវឌ្ឍន៍ និងអ្នកឧបត្ថម្ភជាតិ និងអន្តរជាតិ។

អ្នកស្រី ទេព ច័ន្ទបូរ៉ា

Banteay Srei, ភ្នំពេញ

បច្ចុប្បន្ន អ្នកស្រីជានាយិកាប្រតិបត្តិនៃអង្គការបន្ទាយស្រី ហើយលោកស្រីបានដឹកនាំការអភិវឌ្ឍកម្មវិធី គោលនយោបាយ និងបណ្តាញគាំទ្រនានា ដែលផ្តល់អំណាចដល់ស្ត្រី និងសហគមន៍ងាយរងគ្រោះ ទាំងនៅក្នុងប្រទេសកម្ពុជា និងក្នុងចំណោមបណ្តាញយេនឌ័រថ្នាក់តំបន់។ លោកស្រីមានបទពិសោធន៍យ៉ាងរឹងមាំក្នុងការគ្រប់គ្រងអង្គការមិនមែនរដ្ឋាភិបាល (NGO) ព្រមទាំងមានជំនាញស៊ីជម្រៅលើការដឹកនាំស្ថាប័ន ការអភិវឌ្ឍយុទ្ធសាស្ត្រ ការតស៊ូមតិផ្នែកគោលនយោបាយសម្រាប់សមភាពយេនឌ័រ និងការគ្រប់គ្រងហិរញ្ញវត្ថុ។ លើសពីនេះ លោកស្រីបានចូលរួមយ៉ាងសកម្មក្នុងការជំរុញគំនិតផ្តួចផ្តើមថ្នាក់ជាតិសម្រាប់សិទ្ធិស្ត្រី ការពង្រឹងអំណាចសេដ្ឋកិច្ចផ្អែកលើសហគមន៍ និងការស្រាវជ្រាវលើកិច្ចគាំពារសង្គម និងយុត្តិធម៌យេនឌ័រ។

អ្នកស្រី លុយ​ រស្មី

CEPA, ភ្នំពេញ

បច្ចុប្បន្ន អ្នកស្រីគឺជានាយកប្រតិបត្តិនៃសមាគមអភិរក្សវប្បធម៌ និងបរិស្ថាន (CEPA) ហើយបានដឹកនាំការអភិវឌ្ឍកម្មវិធី ការគ្រប់គ្រងធនធានធម្មជាតិ និងបណ្តាញគាំទ្រសហគមន៍មូលដ្ឋាន និងការអភិរក្សបរិស្ថានទាំងនៅក្នុងប្រទេសកម្ពុជា និងតំបន់មេគង្គក្រោម។ គាត់មានបទពិសោធន៍រាប់ទសវត្សរ៍ក្នុងការគ្រប់គ្រងធនធានធម្មជាតិដែលមានមូលដ្ឋាននៅសហគមន៍ ការនេសាទសហគមន៍ និងការគ្រប់គ្រងអង្គការជាយុទ្ធសាស្ត្រ។ គាត់បានចូលរួមយ៉ាងសកម្មក្នុងការជំរុញការនេសាទប្រកបដោយចីរភាព ការការពារទេសភាពព្រៃលិចទឹកទន្លេមេគង្គ ភាពធន់នឹងការប្រែប្រួលអាកាសធាតុ និងការលើកកម្ពស់ចំណេះដឹង និងជីវភាពរស់នៅរបស់សហគមន៍ជនជាតិដើមភាគតិច។